Cтихи по русинськи.Володимир Ришко

ВУЙКО ПІШТА – МІЛІЦІШТА Ву́йко Пі́шта в ліс пушо́в, Чу́до-па́лічку найшо́в. Партічка́ста, чорно-бі́ла, Вна на ко́рчови вісі́ла. На́рас ве́ллася у во́чі, Гі угинь посе́ред но́чі. Се Госпо́дь дає ми зна́к – Собі ше́пнув небора́к. ’Д сьо́го па́ров ’го стопи́ло, Ноги зм’я́кли, та гі ми́ло. Мокру руку вун потя́г, Чудо-па́лічку дося́г. Та гі ді́вку перший ра́з… У страхо́ви вун пов’я́з. Дар свуй в па́зуху заді́в, Та́куй од страху́ замлі́в. Си́ні ре́хлик, нагаві́ці І пішто́ля зад гузі́ці. Уберну́ло ву́йка Пі́шту На сержа́нта міліці́шту. До́кус Пі́шта наш засла́б, Гі погни́лий карала́б. Пуд березу тихо сі́в, Шапку міліці́стську зді́в. Перепу́джено ся бзе́рать, Штось чини́ти ся добе́рать. Зуби в роті цоркотя́ть, Іти но́ги не хотя́ть. Штось ’му ше́пче: “Встань, іди́. На орса́ґ межи́ люди́. Ма́єш на пути́ стоя́ти, Машини́, што йдуть, спера́ти”. До́ллари ся привиджа́вуть, Чує як з маши́н ’му ла́вуть. Па́лічка уши́тких спе́рать, Жеб од гро́ши ся розде́рать. Шор машин до́рос до Ху́ста, Ця́пкать Пі́штови “капуста”. Гроші в па́зуху вже ді́вать, Так бере, што аж упрі́вать. Айбо ще ’му ся мали́ть, Гривня вже з ґати́ стричи́ть. Ко по орсаґо́ви йде́, Гроші Пі́штови дає́. Де їх класти, вже не зна́є. Ще й у штрі́мфлі гроші хпа́є. Аж топа́нки ’го давля́ть, Пальці на ногах боля́ть. Спе́рать, аж на нус паде́, З гро́ши на́вилок росте́. Пі́шта зму́чився, ухля́в, Силу сво́ю десь закля́в. Ряндяша́ на во́зі спе́р, Сперед ку́ньми ся просте́р. Головов у а́сфальт ду́ркнув, Стули́в во́чі і не му́ркнув. ...Час мину́в, прийшов до тя́ми. Нуч. Улі́зать вун із я́ми. Ліс довко́ла, ві́хор ду́є, Штось у сьо́му не штіму́є. Де глота́? Орса́ґ пропа́в! В ґа́ті од страху́ накла́в. По жеба́х нерво́зно шу́пать, Те́пла сич в топа́нках шлю́пать. Тут береза, корч коля́чий, Палець на нозі боля́чий. Штось чунно́є ви́сить в дра́чу, Пі́штови стає до пла́чу. На голу́зі чорно-бі́ла, Штрі́мфля цу́рава вісі́ла. Ту ’го маєш – міліці́шта, Гроші в сно́ви ві́дів Пі́шта. https://www.youtube.com/watch?v=bRfOv5pK3hQ